Remata Cinema Crianza coa entrega de premios ás mellores curtas do festival

Remata Cinema Crianza coa entrega de premios ás mellores curtas do festival

A curta xaponesa Good Night e a india Rammat-Gammat foron galardoadas nas categorías Axóuxeres e Buxainas respectivamente.

O Festival Cinema Crianza puxo fin á súa segunda edición coa entrega de Premios ás mellores curtas exhibidas durante os catro días que durou o evento, ao que asistiron arredor de 1.500 persoas. 

Os galardóns entregáronse en tres categorías: Axóuxeres para filmes recomendados para menores de cinco anos; Buxainas para os recomendados para maiores de sete anos; e o Premio do Público, outorgado polos asistentes en cada unha das categorías anteriores. O xurado encargado de decidir estivo formado polo director xeral da Academia Galega do Audiovisual, Manuel Mariño, a directora e realizadora Sandra Sánchez e a guionista Sara Gómez Iglesias.

A curtametraxe gañadora na categoría Axóuxeres foi a xaponesa Good Night, de Makiko Nanke, que tamén recibiu o Premio do Público. Nela, o xurado valorou a capacidade do director para contar sen palabras as relacións entre irmáns, usando a imaxinación para resolver os problemas diarios. 

Na categoría Buxainas, o premio do xurado foi para o filme indio Rammat-Gammat, de Ajitpal Singh, proxectado no bloque temático Arredor duha pelota. Un relato sobre a amizade alén dos condicionantes sociais contada con mestría, veracidade e sutileza. O Premio do Público nesta categoría foi para a curtametraxe exipcia Fedhi, de Anne Abadalla.

As mencións especias foron para os filmes Petit, quiero ser grande, da chilena Bernardita Ojeda, na categoría Axóuxeres; e para a iraní A voz de Narge, de Hadi Rhabar, na categoría Buxainas.

Comentarios
Lo más