Os madrigais de "Le nuove musiche de Caccini" soarán nun concerto no Paraninfo

Os madrigais de "Le nuove musiche de Caccini" soarán nun concerto no Paraninfo
Os madrigais de "Le nuove musiche de Caccini" soarán nun concerto no Paraninfo

Estes madrigais soarán o martes 22 ás 20.30 horas no Paraninfo da Universidade

O cantante e compositor Giulio Caccini (1546-1618), autor de ‘Euridice’ -unha das primeiras óperas da historia da música occidental-, reuniu no tratado Le nuove musiche un conxunto de madrigais e arias escritas sobre poemas dalgúns dos poetas máis admirados polos humanistas, como Petrarca, Rinuccini e Guarini.

Estes madrigais soarán o martes 22 ás 20.30 horas no Paraninfo da Universidade no concerto Mirando o ceo que ofrecerán a soprano Magna Ferreira, a tiorba Rafael Muñoz e a actriz Lara Pouso. O recital é o terceiro do ciclo ‘Le nuove musiche. Música instrumental e vocal do século XVII’ que comezou en novembro.

MAGNA FERREIRA

A soprano intérprete é licenciada en Canto (ESMAE), mestra en Educación Musical na Universidade do Miño e en Advanced Vocal Ensemble Studies na Schola Cantorum Basiliensis. Foi membro do Estudio de Ópera da Casa da Música onde traballou con diversos cantantes e pianistas. Actualmente é doutoranda na Facultade de Historia e Xeografía da USC, docente e coordinadora do Curso de Música Antiga da ESMAE e directora artística e pedagóxica do Curso de Música Antiga en Agolada.

Integrou o equipo artístico da Área da Comunidade en Guimarães Capital da Cultura e foi directora do proxecto ‘Voces do Românico’, ademais de dirixir e gravar a estrea de diversas obras contemporáneas de compositores portugueses.

RAFAEL MUÑOZ

Tras obter o título superior de Guitarra polo Real Conservatorio Superior de Madrid, o lugués Rafael Muñoz inicia os seus estudos na especialidade de Instrumentos de corda pulsada do Renacemento e do Barroco no Conservatorio Superior de Sevilla. Posteriormente trasládase a Alemaña para estudar con Rolf Lislevand no Instituto de Música Antiga da Musikhochschule de Trossingen, completando dous posgraos, en interpretación laudística e en música de cámara. No ano 2017 completa un mestrado en investigación musical.

Como intérprete desenvolve a súa actividade concertística en España e noutros países europeos, tocando diversos instrumentos como tiorba, vihuela, laúde renacentista, guitarra barroca e archilaúde. Traballou con grupos como Poema Harmonico, Armoniosi Concerti, Orquestra Barroca de Sevilla, Orquestra de Cámara Reina Sofía, Salzburger Bach Choir, Camerata Iberia, Os Músicos da súa Alteza ou A Reverencia. Co seu grupo A Bellemont publicou dous discos consagrados a Marin Marais (Brilliant Classics) e a François Couperin (Itinerant Records).

LARA POUSO

A actriz Lara Pouso estuda na Facultade de Ciencias da Educación da USC. Desde 2015 forma parte da compañía universitaria de teatro, onde participou nas producións teatrais, Cinzas, Cousas que trouxo a chuvia, Pasar por Nida e A muller que tiña medo e marchou vivir ao Carrefour, coas que ten presentado o seu traballo en diversas localidades galegas e festivais nacionais e internacionais de teatro. Tamén fixo parte da compañía GN Teatro, na produción teatral Cabaret Salomé.

Comentarios