Anunciadas as mobilizacións da seguridade privada polos postos de traballo nas prisións

Anunciadas as mobilizacións da seguridade privada polos postos de traballo nas prisións

O Sindicato rexeita as declaracións realizadas recentemente polo secretario de Institucións Penitenciarias nas que apostaba pola supresión da seguridade privada na vixilancia exterior das cárceres de forma progresiva a medida que se vaian repoñendo efectivos en Policía e Garda Civil

A Federación de Servizos, Mobilidade e Consumo (FeSMC-UGT) anuncia mobilizacións o vindeiro día 28 de febreiro en defensa da continuidade dos postos de traballo da seguridade privada nas prisións. Concretamente, están convocadas concentracións na Coruña, fronte á Delegación do Goberno, a partir das 11:00 horas, e en Pontevedra, fronte á Subdelegación do Goberno, tamén ás 11:00 horas.

O Sindicato rexeita as declaracións realizadas recentemente polo secretario de Institucións Penitenciarias nas que apostaba pola supresión da seguridade privada na vixilancia exterior das cárceres de forma progresiva a medida que se vaian repoñendo efectivos en Policía e Garda Civil, entre outros aspectos. Para FeSMC, isto reabre un debate entre o público e o privado neste sector que xa estaba superado neste país e no propio marco europeo.

A complementariedade entre o público e o privado queda resolta no marco da seguridade no seu conxunto. Na actualidade, a seguridade privada en España xoga un papel complementario coa pública, a primeira exerce unha función na protección de instalacións recoñecidas de alto risco con garantías profesionais amplamente demostradas e, pola súa banda, a seguridade pública exerce o seu papel á hora de garantir a seguridade cidadá.

Ademais, é sobradamente coñecida a opinión do Ministerio do Interior que en reiteradas ocasións recoñeceu a valía e eficacia dos traballadores da seguridade privada nos centros penitenciarios. FeSMC rexeita que se xogue cos traballadores ao quita e pon dependendo da cor política do Goberno de turno.

Por todo isto, o Sindicato de Seguridade Privada e Servizos Auxiliares de FeSMC-UGT decidiu convocar mobilizacións pola defensa da continuidade dos postos de traballo de seguridade privada en prisións.

Comentarios