A CIG gaña as eleccións sindicais no Junior's e denuncia os impagamentos dos traballadores dende decembro

A CIG gaña as eleccións sindicais no Junior's e denuncia os impagamentos dos traballadores dende decembro

Desde decembro ningún dos 23 traballadores e traballadoras cobrou ningunha nómina nin cantidade algunha

A CIG-Ensino vén de gañar as elección sindicais celebradas o luns no Colexio Junior´s con 14 votos, obtendo así o 56% do respaldo do seu cadro de persoal. Estes resultados son máis relevantes se cabe, dado que catro traballadoras, entre elas a que ía ser a candidata do sindicato, foron despedidas en febreiro.

Aínda así, malia a conflitividade laboral que existe coa administración do centro e os atrancos para que estas eleccións se celebrasen como estaba previsto inicialmente, a nova candidata da CIG-Ensino foi a elixida como nova delegada de persoal do centro.

O sindicato agradece o apoio, unha vez máis, da maioría dos traballadores e traballadoras e comprometémonos a seguir abordando desde todas as frontes, a da negociación, a da inspección de traballo e a xurídica, para conseguir que se lle abonen os salarios atrasados a todo o conxunto do persoal. Desde decembro ningún dos 23 traballadores e traballadoras cobrou ningunha nómina nin cantidade algunha.

Así mesmo, xa existen as primeiras sentenzas favorables de demandas contra o administrador do colexio que o obrigan a abonar os salarios das persoas que foron despedidas ou marcharon voluntariamente ante a situación de impagamentos.

Comentarios