Beiras confirma que non será candidato ao Senado nas vindeiras eleccións

Beiras confirma que non será candidato ao Senado nas vindeiras eleccións
Beiras confirma que non será candidato ao Senado nas vindeiras eleccións

Anova confirmou que esta proposta si existiu pero que non foi nin tida en conta pola formación nacionalista

O fundador de Anova, Xosé Manuel Beiras, confirmou onte en Vigo que non será candidato ao Senado pola coalición que están a negociar Podemos, Esquerda Unida e Anova para as eleccións xerais do mes de abril e afirmou que todo é un " bulo, unha fake new".

"Ninguén falou comigo, nin me consultaron nada”, dixo Beiras en relación ás últimas noticias nas que o situaban como a proposta de Podemos Galicia ao Senado nas próximas eleccións xerais.

Anova confirmou que esta proposta si existiu pero que non foi nin tida en conta pola formación nacionalista.

"Quen ía pensar que eu ía aceptar ser senador"”, finalizou Beiras, que o próximo mes de abril cumprirá 83 anos.

Con todo, as direccións de Anova, Esquerda Unida e Podemos Galicia continúan coas negociacións para tratar de configurar unha coalición electoral para as xerais do próximo 28 de abril ás que concorrerán á marxe de En Marea, que se presenta á cita coas urnas en solitario.

Os partidos apuran as negociacións xa que o prazo para rexistrar as coalicións para os comicios de abril finaliza o venres e ningún dos partidos quere ceder as súas posibilidades de obter representantes, en tanto que asumen que os resultados poderían ser peores ao concorrer por separado de En Marea.

Deste xeito, mentres que a praza de cabeza de lista pola Coruña parece claro que será para o líder de Podemos Galicia, Antón Gómez Reino, a persoa que encabezará a lista por Pontevedra aínda está en dúbida, xa que tanto Esquerda Unida como Anova queren pugnar por ela, que ofrece máis posibilidades de alcanzar un deputado que a circunscrición por Ourense ou Lugo.

Comentarios