Unha das probas do campionato canino de España celebrarase en Milladoiro

Unha das probas do campionato canino de España celebrarase en Milladoiro
Mundoanimal
Unha das probas do campionato canino de España celebrarase en Milladoiro

Hai inscritos arredor de 70 cans, que competirán en tres días, dende ovenres 26 ao domingo 28 de xullo



O campo de fútbol do Milladoiro acolle esta fin de semana unha nova proba de Agility que puntúa para o campionato de España. Organizada polo club canino Amizar Agility, a proba conta coa colaboración do Concello de Ames, da S.D. Milladoiro, da empresa Arion e da clínica veterinaria Media Lúa. Hai inscritos arredor de 70 cans, que competirán en tres días, dende o venres 26 ao domingo 28 de xullo. Domingos Carneiro exercerá como xuíz nesta competición.

O club canino Amizar Agility organiza novamente unha proba tripla que puntúa para o campionato de España 2020 da Real Sociedade Canina de España. Desta volta, a competición desenvolverase en tres días. O venres 26 e o sábado 27, as probas comezarán ás 16:30 horas, mentres que o domingo serán a partir das 09:30 horas. En función do tamaño dos cans, estes serán divididos en tres categorías diferentes: mini, midi e estándar. A primeira inclúe animais que saltando non conseguen superar os 30 centímetros. A segunda abrangue aqueles outros cuxo chimpo acada alturas de 40/50 centímetros. A terceira das categorías, a estándar, inclúe os cans de maior tamaño que conseguen realizar saltos de ata 60 centímetros.

Asemade, a competición presenta tres graos diferentes. O primeiro equivalería a un nivel de iniciación, en tanto que o segundo sería un nivel intermedio. O terceiro dos graos é o máis elevado da competición, ao presentar maiores esixencias para os animais e pistas de maior dificultade. E cada un dos graos conta con dúas probas: o jumping e o agility. O jumping está conformado por circuítos nos que as zonas de contacto non están presentes, polo que os animas alcanzan maiores velocidades. O agility, ao contrario, si que presenta zonas de contacto, as cales deben ser tocadas polas cans no desenvolvemento da proba.

Unha das novidades que presenta esta nova proba de Agility é que poderán participar cans en grao cero (pre-agility). Estas probas inclúense ao final das xornadas de venres e sábado e, se ben teñen carácter competitivo, non serán puntuables. A idea é que eses cans que se están a iniciar nesta modalidade teñan un adestramento en contacto coa competición.


Comentarios