Un home necesitou axuda para saír da zona rochosa á que caeu cando pescaba en Punta Buitra, Muxía.

Para o rescate do ferido activouse un operativo do que formaron parte os Bombeiros de Cee, voluntarios de Protección Civil e os axentes da Policía Local e Garda Civil.

A intervención dos recursos de emerxencias permitiu acceder ao ferido para que fose atendido polos servizos sanitarios de urxencia debido á forte dor nas costas que padecía a causa do golpe. Así o confirmaron ao persoal do 112 Galicia despois de que, pasadas as cinco desta tarde de onte, se activase o operativo para sacar ao pescador do desnivel no que se atopaba.

Precisamente, foron os voluntarios de Protección Civil da localidade quen deron a voz de alerta e a partir de aí iniciouse unha operación na que colaboraron, ademais, os bombeiros de Cee e axentes de seguridade.

Para poder acceder ao ferido, foi necesaria unha padiola especial debido á situación na que se atopaba o pescador e a dor ocasionada pola caída.

Finalmente, o home foi evacuado nunha ambulancia do servizo sanitario de urxencia.