O IGFAE reitera o impacto do programa de excelencia Severo Ochoa-María de Maetzu

O IGFAE reitera o impacto do programa de excelencia Severo Ochoa-María de Maetzu
O IGFAE reitera o impacto do programa de excelencia Severo Ochoa-María de Maetzu

Os programas de excelencia Severo Ochoa e María de Maeztu identifican e promoven a excelencia na investigación científica

O Instituto de Galego de Física de Altas Enerxías (IGFAE), representado polo seu director, o profesor Carlos Salgado,  participou no encontro celebrado entre o Ministerio de Ciencia, Innovación e Universidades; os centros e unidades distinguidas co selo de excelencia Severo Ochoa e María de Maetzu; e os conselleiros e altos cargos de quince comunidades autónomas. 

O encontro tivo por obxecto destacar o impacto do programa Severo Ochoa – María de Maeztu, os seus beneficios para a consolidación da investigación de excelencia e o seu potencial como puntal e trampolín para os polos de investigación das diferentes comunidades autónomas. Seis centros e unidades de investigación, entre os que se atopa o IGFAE, expuxeron o seu percorrido ata lograr o galardón e o impacto que tivo a axuda. A sesión foi co-presidido polo ministro Pedro Duque e Luis Serrano, presidente da alianza Severo Ochoa – Maria de Maeztu (SOMMa). Tamén participaron da mesa Enrique Playán, director da Axencia Estatal de Investigación, e Maria Blasco, vicepresidenta da alianza SOMMa.

Na xornada, o director do IGFAE, Carlos Salgado, presentou o caso deste instituto mixto da USC e a Xunta de Galicia, acreditado como Unidade de Excelencia ‘María de Maeztu’ en 2017. Esta distinción, única en Galicia, está a permitir ao instituto levar a cabo un fortalecemento importante da súa base científica, establecendo novas alianzas con grandes infraestruturas internacionais, como a colaboración LIGO en ondas gravitacionais. A acción principal para este fortalecemento é un ambicioso programa de captación de talento chamado IGFAE Global Talent que nun só ano permitiu abrir estas novas liñas e conseguir financiamento externo en convocatorias tan competitivas como Ramón y Cajal ou La Caixa.

Un fortalecemento das unidades técnicas de computación de altas capacidades, xestión e comunicación, así como unha implementación máis dinámica da dirección do centro están tamén na base dos avances acadados neste instituto. Por outra parte, grazas á distinción María de Maeztu o IGFAE entra a formar parte da rede de centros impulsadas desde a Consellaría de Educación da Xunta de Galicia cun modelo de funcionamento como centro mixto único no sistema galego.

O ministro de Ciencia, Innovación e Universidades, Pedro Duque, asegurou “o firme apoio do Goberno ao programa de excelencia Severo Ochoa e María de Maeztu e destacou a importancia de que haxa máis CCAA capaces de albergar centros destas características, o que beneficiará os seus sistemas de ciencia e innovación.” O ministro aclarou, así mesmo, que “os niveis de esixencia seguirán sendo igual de rigorosos que na actualidade, polo que o obxectivo é que haxa máis centros capaces de elevar os seus niveis de excelencia, para o que deberán contar co apoio das distintas administracións”.

Segundo declarou Luis Serrano, “esta reunión é produto dunha postura construtiva e positiva con respecto á investigación en España. É fundamental o interese do goberno e apoio das comunidades autónomas á investigación para que España aspire a ser un país en que rexa a economía do coñecemento. O programa Severo Ochoa – María de Maeztu é unha potente panca da que as comunidades autónomas poden servirse para potenciar aos seus centros de investigación.”

Ademais do IGFAE, tamén expuxeron o seu percorrido o Instituto de Física Interdisciplinar y Sistemas Complejos (IFISC; Illas Baleares), o Departamento de Regulación Génica y Morfogénesis (GEM/DCM2, Andalucía), o Instituto de Neurociencias de Alicante (IN; Comunidad Valenciana), o Basque Center for Applied Mathematics (BCAM, País Vasco) e o Instituto de Astrofísica de Canarias (IAC, Canarias), facendo patente a presenza de investigación de excelencia en boa parte da xeografía española. 

Os programas de excelencia Severo Ochoa e María de Maeztu identifican e promoven a excelencia na investigación científica. O seu obxectivo é impulsar a ciencia española mediante o recoñecemento de centros de investigación de vangarda existentes, brindándolles, ademais, apoio para potenciar o seu impacto, o seu liderado científico internacional e a súa competitividade.

Comentarios