A veciñanza amesá involucrouse na iniciativa “Móllate polos ríos”

A veciñanza amesá involucrouse na iniciativa “Móllate polos ríos”
A veciñanza amesá involucrouse na iniciativa “Móllate polos ríos”

Dous grupos de voluntarios/as percorreron as dúas beiras e a canle do Rego dos Pasos para recoller un total de 80 quilogramos de lixo


Preto de vinte veciños e veciñas de Ames participaron este pasado domingo, 29 de setembro, na xornada de limpeza simultánea de ríos e regatos en toda Galicia, baixo o nome “Móllate polos ríos”. Coordinada pola Asociación para a Defensa Ecolóxica de Galicia (ADEGA), a actividade consistiu, en Ames, na limpeza das dúas beiras e a canle do Rego dos Pasos. O concelleiro de Transición Ecolóxica e Medio Rural, Manuel Lens, a concelleira de Promoción Económica, Ana Belén Paz, e a responsable da Aula da Natureza, Patricia Reboreda, participaron desta xornada de limpeza de ríos e regatos.

Dous grupos de voluntarios/as percorreron as dúas beiras e a canle do Rego dos Pasos para recoller un total de 80 quilogramos de lixo. Na canle atopáronse pneumáticos fora de uso, canos, loza, restos de obra e moitas botellas. Nas beiras, lixo máis pequeno como papeis, latas ou restos de envoltorios. A pesar da chuvia, a actividade desenvolveuse facendo bo o lema de “Móllate polos Ríos”. Unha vez transcorrida a limpeza, os/as participantes reuníronse na praza do Concello para avaliar a natureza e quilos de lixo recollidos en cada río para, despois, depositalos nos correspondentes contedores.

O concelleiro de Transición Ecolóxica e Medio Rural, Manuel Lens, explicou que “a primeira vista parece que o lixo diminuíu con respecto a anos antenriores, se ben estamos a falar dunha cantidade importante a recollida o pasado domingo. Agora debemos remitir os datos acadados ao longo da xornada a ADEGA, para coñecer máis polo miudo, a través dun informe, o estado dos nosos ríos”.

A asociación ADEGA, a través do programa “Proxecto Ríos”, vén organizando dende o ano 2008 estas xornadas de limpeza simultánea de ríos e regatos en toda Galicia. O “Proxecto Ríos” é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participació.

Comentarios