O Goberno aproba a derrogación do despedimento por baixas médicas xustificadas

O Goberno aproba a derrogación do despedimento por baixas médicas xustificadas
O Goberno aproba a derrogación do despedimento por baixas médicas xustificadas

A CIG considera "insuficiente" este "simple parche" e reclama unha "derrogación completa" das reformas laborais.

O Consello de Ministros aprobou hoxe un Real Decreto-lei para derrogar o artigo '52.d' do Estatuto dos Traballadores que permite aos empresarios o despedimento obxectivo dun traballador por acumular baixas médicas xustificadas.

A ministra de Traballo e Economía Social, Yolanda Díaz, subliñou tras a rolda de prensa posterior ao Consello de Ministros que o artigo '52.d' quedará derrogado desde mañá, polo que "xa non se poderá despedir a ninguén" por ter unha baixa xustificada por enfermidade.

Este artigo, que foi modificado coa reforma laboral de 2012, establecía que un contrato de traballo pode extinguirse por faltas de asistencia ao traballo, aínda xustificadas pero intermitentes, que alcancen o 20% das xornadas hábiles en dous meses consecutivos, sempre que o total de faltas de asistencia nos doce meses anteriores alcance o 5% das xornadas hábiles ou o 25% en catro meses descontinuos dentro dun período de 12 meses.

A ministra de Traballo resaltou que a derrogación deste artigo supón "reparar dereitos dos traballadores e emendar unha anomalía" que existía na normativa española respecto doutros países da contorna, onde non existe un precepto similar.

Ademais, indicou que con esta decisión empézase a "desmontar" a reforma laboral do PP, dáse "seguridade xurídica" aos traballadores e cúmprese co mandato do Tribunal de Xustiza da Unión Europea, que instou o Goberno español a modificar a súa lexislación ao considerar discriminatoria esta causa de despedimento.

Díaz denunciou ademais que o artigo '52.d' xerara "alarma" entre a sociedade. "A partir de agora impedimos que as persoas, cando se senten máis vulnerables, sexan despedidas", dixo a ministra, que xustificou que se utilizou a figura do Real Decreto-lei en que se trata de preservar dereitos.

SEN CARÁCTER RETROACTIVO

Preguntada por se a derrogación deste artigo afectará ás denuncias xudiciais en curso, a ministra sinalou que non terá carácter retroactivo e que entrará en vigor a partir da súa publicación no Boletín Oficial do Estado (BOE).

A supresión do '52.d' prodúcese despois de que o Tribunal Constitucional, nunha sentenza coñecida a finais de outubro, avalase a extinción do contrato laboral por causas obxectivas se hai faltas de asistencia xustificadas aínda que intermitentes.

O aprobado hoxe é a derrogación do artigo, non a súa modificación nin a súa substitución por outro texto. Desta forma, a acumulación de baixas médicas xustificadas deixará de ser unha causa obxectiva para o despedimento dun traballador.

Isto non significa que un empresario non poida despedir a alguén do seu persoal por faltas de asistencia ou impuntualidade, pois podería argumentar esta razón para realizar o que se coñece como despedimento disciplinario.

Doutra banda e respecto ao calendario previsto para o desenvolvemento do diálogo social, a ministra insistiu en que para que este proceso vaia ben se necesita discreción, á vez que explicou que os aspectos "máis urxentes" relacionados coa modificación da reforma laboral de 2012 (precariedade laboral e reequilibrio da negociación colectiva) están a traballarse xa cos axentes sociais.

A CIG CONSIDÉRAO "INSUFICIENTE"

Pola súa banda, a CIG considera "insuficiente" a derrogación deste artigo e demanda que haxa unha "derrogación completa" das reformas laborais. Nun comunicado, cualifica de "simple parche" esta decisión ante a "grave deterioración" das condicións laborais da clase traballadora, polo que reduce esta modificación a unha "operación de maquillaxe" e censura que se busque "vender como un gran avance".


Comentarios