A concellaría de Obras ten planificadas para o que resta de ano 19 actuacións

A concellaría de Obras ten planificadas para o que resta de ano 19 actuacións
A concellaría de Obras ten planificadas para o que resta de ano 19 actuacións

O concelleiro de Barrios e Obras, Javier Fernández, realizou unha valoración do estado de execución das distintas actuacións programadas polo seu departamento para 2021. Son un total de 22, dúas delas xa rematadas, que axudarán, sinalou o concelleiro, "na recuperación económica e na creación de emprego".

Javier Fernández explicou que neste momento que hai unha obra en execución, a da Rúa de Concheiros, cun custe de 2.170.872,18 euros; e que xa se remataron dúas actuacións: os muros de Fontiñas e o muro de Costiña do Monte, que está previsto recepcionar mañá. Para o que queda de ano hai planificadas 19 obras, cun orzamento de 7.188.852,2 euro: 4 delas adxudicadas, 8 en proceso de licitación, e 7 pendentes de licitación.


Obras adxudicadas
O concelleiro destacou as dúas obras, con cargo aos remanentes de 2019, que están adxudicadas e a piques de comezar as obras. A primeira: o acondicionamento do campo da festa do Castiñeiriño, adxudicada a "Barnacle Obras y Servicios", cun orzamento de 335.474,56 euros, e un prazo de execución de 5 meses. "Hoxe comeza o valado e colocación do campamento de obra. O venres, 11 de xuño, está previsto a sinatura de acta de comprobación de replanteo. E o luns, 14 de xuño, é o inicio das obras", segundo explicou Javier Fernández.

Trátase dunha obras, engadiu, que dá resposta as demandas veciñais, que "pedían o acondicionamento como novo campo da festa das parcelas dotacionais EQ1 (1.200 m²) y EQ2 (3.961 m²) xeradas pola urbanización do polígono SUNP 11 do Castiñeiriño; e situadas detrás da Igrexa da Nosa Señora de Fátima e do antigo colexio Ramón Cabanillas".

Fernández explicou que o proxecto construtivo contempla distintas funcionalidades, tanto fixas como temporais, entre elas a instalación das atraccións feirais durante as festas do barrio ou escenarios móbiles para actuacións (elevadas sobrecargas sobre o pavimento), pistas deportivas (plataforma horizontal libre de obstáculos), aparcamento alternativo (actos litúrxicos na igrexa), gradas, acceso as antigas instalacións do colexio Ramón Cabanillas para o seu posible aproveitamento vinculado (vestiarios, camerinos, etc.), etc. Entre outras actuacións, pavimentarase a área achairada que actualmente conta cun acabado de formigón; e instalaranse diversos servizos de drenaxe para a canalizacion de pluviais, alumeado, etc; así como unha serie de chanzos prefabricados que se acondicionarán como zonas axardinadas.

A segunda obra adxudicada, con cargo aos remanentes de 2029, e a mellora da accesibilidade do Pazo de Raxoi pola entrada da Costa do Cristo. Foi adxudicada á empresa Joscón SL, e conta cun orzamento de 40.536,45 euros e un prazo de execución de dous meses e medio.

Javier Fernández tamén destacou a inminente execución doutras dúas obras, xa adxudicadas, pero con cargo ao orzamento de 2021. O palacete da finca do Espiño, contratado a Bauen Empresa Constructora SAU por 1.425.922,9 euros; e a Ponte Vella de Vidán, que acondicionará Ogando SL, por 126.959,15 euros.

Obras en licitación
As obras en licitación, con cargo ao remanente de 2019 son a humanización da rúa do Horreo na contorna da intermodal, que conta cun orzamento de 610.000 euros e un prazo de actuación de 4 meses; a urbanización de Cotaredo-Rúa do Valiño, cun custe de 165.876,26 euros e un prazo de execución de medio ano; o aparcadoiro da rúa da Altiboia, que cando estea rematado, segundo o concelleiro contara cunhas 90 prazas, e que conta cun orzamento de 208.907,95 euros e un prazo de execución de 5 meses.

Tamén destacou a reforma dos aseos na rúa Trindade e os de Raxoi, por 397.886,38 euros e un prazo de execución de 5 meses; a rexeneración do pavimento da Avda. de Asturias, que costará 517.204,47 euros. Segundo avanzou Javier Fernández, está previsto que as obras se inicien en xullo e se prolonguen durante 4 meses.

Outra obra importante, sinalou, é a renovación do céspede do campo de fútbol do Sergas. Conta cun orzamento de 568.267,15 euros, e calcula que este rematada en mes e medio, para que xa se poida utilizar o campo en setembro. Outra actuación que está previsto que se inicie en verán e a cuberta de uso múltiples de Santa Marta, con 165.000 euros de orzamento e un prazo de execución de 4 meses. E por último, con cargo ao remanente, o concelleiro destacou o proxecto de humanización do barrio da Estila e accesibilidade da Almáciga, que ten un custe de 78.000 euros e un prazo de execución de 2 meses.

Obras pendentes de licitación
Con cargo ao remanente de 2019 quedan dúas obras pendentes de licitación: a rexeneracion aslfática da cidade, cun orzamento de 820.000 euros e un prazo de execución de 4 meses que, subliñou o concelleiro se levará os próximos días a Xunta de Goberno; e as obras de accesibilidade en distintos puntos da cidade, cun custe de 247.000 euros e un prazo de actuación de dous meses e medio.

Outras obras pendentes de licitación, esta vez con cargo ao orzamento de 2021, son os accesos a Lamas de Abade (126.711,20 euros); distintas actuacións no Rueiro de Vidán (203.698,31 euros) e en Salvador Parga (218.913,58 euros), o reacondicionamento da contorna da dársena de Xoan XXIII (300.000 euros) e a obra de reparación do muro da Alameda, na parte que é titularidade do Concello de Santiago (400.000 euros).

Na rolda de prensa, Javier Fernández estivo acompañado polo xefe do Servizo de Proxectos e Obras, Antonio Ranedo. 
Comentarios